* مدونة أخويا الكبير وأستاذي د.أحمد عبدالمنعم وهي جزء داخلي من الموقع علي الرابط التالي : http://traigey.manofsadness.com

* أكتب تدوينة لأن بقالي كتير مكتبتش .

المهم إني لما بصيت في تاريخ النهاردة لقيت إن عدي أربع أيام بحالهم علي 2012 ، وأنا بصراحة من آخر يوم في ديسمبر وأنا دماغي عمالة تروح وتيجي بالذكريات والأحداث اللي حصلت في السنة اللي فاتت ! كتير أوي عدي وحصل في 2011 … علي الأأقل علي المستوي الشخصي بالنسبة لي .

زي النهاردة بالظبط كنت بجهز لحفلة تخرج دفعتنا اللي كانت هتبقي زي بكرة كدة ، بصراحة كنت مفعم بالحيوية كتير أوي عن دلوقتي ! حتي التفكير والأهداف والدنيا شكلها ومضمونها كان مختلف شكلي وجزئي .. سبحان الله سنة 2011 هي السنة اللي ببساطة المفروض توقف فيها عقلك بشكل نهائي ! لأن أي توقع هتتوقعه متعرفش هيحصل ولا لا ، وهيحصل إزاي بردة .

معرفش مين كان يقدر يتخيل إن حال البلد يتغير ؟ وزي ما قال صديق ليا … تخيل لو مكنتش الثورة حصلت ، تتوقع حال البلد دلوقتي كان هيبقي عامل إزاي ؟ طب حسني كان هيقول إيه علي ليبيا ؟ واليمن ! .

يوم 26 يناير 2011 الساعة 12 ونص بليل تقريباً ، كعادتي اللي كنت متعود عليها لمدة 5 سنين قاعد براجع إيميلات شركتي وبراجع طلبات العملاء وشغل فريق العمل .. مع شوية من تعديلات بعملها ومراجعة لأنظمة التشغيل واللي تم فيها ، م الآخر بعمل شغلي في الشركة ! لقيت فجأة علي تويتر رسالة ومعمولي منشن فيها … مقر الشركة بيولع ! إلحقي يا @manofsadness !!!!

دي كانت رسالة من صديقي علي تويتر @MidooDJ كان في المقر سهران لوقت متأخر بيخلص شغله في التسويق وفجأة إنفجرت أنبوبة غاز في عمارة ورا مقر الشركة في مدينة السلام بجسر السويس ! وهنا بدأت ليلة إستمرت حتي فجر الجمعة بنحاول نلحق ما تبقي من محتويات مقر الشركة ، وكون شغلنا كله موجود علي سيرفرات وأجهزة برا مصر فكان المهم بالنسبة لينا نلحق الحاجات المادية الموجودة ، وربنا كرمنا وقدرنا نلحق اللي قدرنا عليه ! ، اللي حصل ده خلانا نقعد 3 أيام منعرفش فيه إيه في البلد ! فجأة يوم الجمعة صحيت لا فيه لا نت ولا تليفون ولا موبايل ، كانت العيلة كلها موجودة في قريتنا في الشرقية ، كان توقعي وقتها إن المشكلة في الشبكة هناك ، جربت كل موبايلات وكل الشركات التلاتة ولكن لا جدوي ! لقيت النت شغال بس التويتر والفيس بوك مكنوش شغالين وهنا بدأت مرحلة إستخدام الـ VPN ووجود الإمكانيات دي في شركتي ساعدني أدخل وأشوف اللي بيحصل ، ووجود الجزيرة والعربية ( في البداية فقط ) بدأت أعرف اللي بيحصل في التحرير ، كنت مستغرب من رد فعل الحكومة أصلاً وإزاي متعاملوش بعنف كعادتهم مع حاجة زي دي ! وعرفت بعدين إن العادلي قال للمخلوع متقلقش ياريس دي شوية عيال وهيروحوا ، لكن مين كان متخيل العيال دي هتعمل إيه … المهم بدأت الإشاعات تطلع والناس تتكلم والبلد إتوقفت والطريق واللذي منه ، نتيجة لدة كل اللي كان معاه عربية خاصة بيه في العيلة قدر يسافر ويرجع لبيته في القاهرة وأنا رجعت للبيت في بنها لأن بدأ بقي يتقال فيه بلطجية وناس مش عارف بتعمل إيه وبدأت الداخلية تسحب كلابها من الشوارع وكان لزاماً علي كل واحد يرجع بيته عشان يحمي حاجته … وقتها بقي بدأنا تنظيم نفسنا في مجموعات عشان نحمي المنطقة … كل ده ومحدش في باله اللي بيحصل وإن فيه ناس في التحرير قاعدة ، طبعاً كان الضرب إشتغل وناس ماتت في الميدان والجيش واقف في مدخل القاهرة ومحدش يقدر ينزل ( علي حسب ما عرفت ) ده غير كمان إن مفيش مواصلات ومفيش حد هيجازف ويشغل عربيته ويوصل الناس للقاهرة ! حاولنا بعربيات خاصة بزمايلنا لكن للأسف اللجان الشعبية كان ممكن تبهدلك علي ما تخرج من شارع واحد بس .

أنا متذكر إن بقالي مدة مكنتش بظهر في المنطقة عشان الكلية والإمتحانات وخلافها ، وفجأة أول لما أظهر بدل ما أظهر علي شكل طبيب ، طالع لهم شايل جذع شجرة وبنظم السلاح مع ناس كان معاها سلاح !

وقتها عرفت إن النت عند مستخدمي LinkDotNet شغال وبيفتح موقع واحد بس ! وهو موقع مصراوي ، وقتها جت لي فكرة عمل سيرفر داخلي علي جهازي لأني كنت بعمل الفكرة دي دايماً لما كان الإنترنت بيفصل بسبب الكابلات البحرية ، بس المرة دي كان الوضع مختلف ، قدرت أوصل لبعض الأصدقاء في المناطق المجاورة وبمقارنة الآي بي بينا وبين بعض إكتشفنا بعضنا شغال علي آي بي بيبدأ بـ 41 والبعض الآخر بـ 192 ، وبعد حوالي 15 ساعة من المحاولات الفاشلة ومحدش بيقدر يوصل لجهازي إلا قلة قليلة .. وكان الغرض من الموضوع ده وقتها مش بس نعمل موقع ، كان كمان بدل ما الناس بتقول إشاعات في بنها كلها ده حصل مش عارف إيه في المنطقة الفلانية كنا هنوصل لبعض بشكل أسرع ونكتب في موقع واحد أو في مكان واحد الخبر واللي ساكنين في المكان ده يأكدوا أو ينفوا الخبر ، لكن إكتشفت إن فصل الإنترنت كان علي حسب ما عرفت من صديق خبير شبكات في أحد الشركات الكبري في مصر ، إن فيه Backbone للإنترنت في رئاسة الوزراء ، وفيه واحد تاني في الأقصر ، غير كمان إن الناس مفصولة من رئاسة الوزراء ، أو من الشركات نفسها من الخطوط الأساسية .. وبالتالي متقدرش توصل لحد في شركة تانية ! يعني يا إما ناس في نفس رينج الآي بي بتاعك أو في رينج تاني … أنا فاهم الفكرة بس مش عايز أوسعها عشان محدش يتوه مني .

المهم إن فكرة سيرفر فشلت ! وقتها كنت أنا خاطب من إسكندرية ، وهما ساكنين هناك جمب الأمن المركزي في العمارات اللي قدامه ، كانوا بيحكوا لي مأساة الغاز اللي بيوصلهم في البيوت ومشاكلهم الصحية اللي حاصلة بسبب الغاز ، وبصراحة كان الأمن المركزي مبهدلهم جداً ، بس الناس هناك بهدلوا مقر الأمن المركزي جداً وكان فيه ضرب نار ده غير إن فيه بلطجية بدأو يطلعوا للناس بيوتهم وحاجات غريبة وناس بتستولي علي بيوت ناس أو الشقق الفاضية ، المهم الوضع عندهم كان لا يقل سوء عن عندنا .

في يوم قررت أنا وصديق ليا ننزل نمون عربيته بنزين ونشوف الوضع إيه ، كون إني أنا وهو معروفين في المنطقة بس هو معروف أكتر كونه مسؤول عن وصلة الإنترنت وخلافها ، المهم إتحركنا لحد لما خرجنا علي مشارف المنطقة الناس كانت عارفانا والدنيا كويسة … 10 متر بالظبط ودخلنا في لجنة شعبية تانية صاحبي لسه مقالش السلام عليكم ! طلعوا عليه “فرفر” أو مسدس صاحبي مكملش كلامه وطلع كل اللي في جيبه من بطاقة ورخصة وخلافه ! ودي كانت المرة الوحيدة اللي إتجرأنا فيها ، بس طبعاً كنا مضطرين نتأكد من كل الشائعات اللي إتقالت عن إن فيه بلطجية ولعوا في محطة الغاز وكمان كان لازم نطمن علي كل الناس اللي تبعنا في كل مكان ، المهم طبعاً طلع كله كلام ملوش أي أساس من الصحة ، فعديت علي مستشفي الجامعة وكونها بعيدة عن بيتي ومقدرش أوصلها غير بعد مشوار ما يقرب من نص ساعة فقررت إن زمايلي اللي ساكنين جمبها هم أحسن ناس هيقوموا بالواجب وقتها !

رجعت البيت وبدأت الأمور تهدي شوية في شوية والناس تعرف إن كلاب الداخلية هما مروجي الشائعات دي ، بعدها بدأ ينزلنا المخلوع بخطاب مستفز وراه خطاب أكتر إستفزاز ، وقتها بقي كان لازم أنزل التحرير ولازم أشوف الدنيا هناك وأشوف أساعد إزاي ، وكان القرار ده أخدته للأسف يوم الجمعة 11 فبراير وكان الإتفاق بينا وقتها إننا هنسافر مجموعة مع بعض في القطر عشان لو حد حصله حاجة الباقي يحميه ، ونركب المترو سوا … وإنطلقنا مجموعة مع بعض الساعة 9 يوم الجمعة إلي ميدان التحرير …

يوم التنحي ده يوم لوحده ، وده بإذن الله هيكون في الجزء التاني ، أتمني إن التدوينة تعجبكم وفي إنتظار التعليقات والآراء .

يمكنك مشاهدة الموقع من خلال الرابط التالي :

National Bank of Egypt Al-Ahly net.

بعدما يقرب من خمس أعوام علي حصولي علي إسم النطاق الحالي www.manofsadness.com كهدية في عيد مولدي من صديقي العزيز هاشم زهران والذي كان من المقرر بأن أقوم بعمل مدونة بداخله كجزء من الموقع مذ ذلك الحين ، وهو ما جعلني أعيد التفكير في الأيام الماضية لهذا الأمر مرة آخري ولعدة أسباب آخري بالطبع قد أوضحها لاحقاً .